Wampiryczny syrial fantasy czerpióncy z tradycji filmu noir ło prywatnych detektywach, a i kina kostiumowego (retrospekcje!)... A jak jeszcze dodać do tego Charisma Carpenter w jednyj z głównych ról, to już wiadómo, że jes to dzieło kultowe! :)
- trocha mo tyn Angel z Batmana (łazi w ciymnym mantlu po nocy i ścigo złoczyńców), trocha z Bogarta (niy wliczajónc retrospekcyjnych wóntków siyngajóncych XVIII wieku, w kierych cechuje sie ylymyntami typowego awanturnika-bohatera rómantycznego), ale pómysłowe jes tyż, że poza mordobiciami kupa czasu spyndzajóm bohatery tego syrialu w bibliotyce, kaj przeglóndajóm ksiyngi, raptularze, zbiory kozań i traktaty kaj mogóm znalyźć łodpowiedzi, jak pozbyć sie poszczególnych demónów, które zaś majóm sporo cech kojarzóncych sie z czym innym niż ino z wampirami i diobłami.
- czyńś z nich mo cechy przestympców (bo działajóm w nocy i sóm zbrodniorzami), czyńś gejów (ukrywajóncych swoja tożsamoś przed resztóm społyczyństwa), a jeszcze inni kojarzóm sie z ymigrantami (czimióm sie w swoich klanach, prowadzóm egzotyczno-oriyntalne knajpy, niy asymilujóm sie z resztóm łobywateli za bardzo).
- sóm wóntki w których demóny czystyj krwi zwalczajóm ukrywajóncych sie przed niymi i przimusowo ymigrujóncych miyszańców, co jes zaś ywidyntnym nawiónzaniym do znanyj nóm z historii, tragicznyj opozycji Żydy vs. Nazisty. Sami miyszańcy majóm czynsto cechy herosów abo półbogów (mitologia grecko sie kłanio)... - czyli mómy w tym syrialu tyż kupa zasygnalizowanych, acz zawoalowanych wóntków z amerykańskij i niy ino historii i kultury (Anioł poszczegany jes tyż czasami jako kolejny superbohater).
- sóm wóntki wojyn gangów w gettcie, prostytutek (wszysko to demóny)
- jedyn z bohaterów to milióner-geek (nerd), który dorobił sie na oprogramówaniu (kolejno typowo-stereotypowo postać z kultury amerykańskij poczóntków ery internetu)
- minus tego syrialu: fakt, że niyktóre demóny wyglóndajóm czasym jakby pitły z filmów trómy (kicz!), sóm tyż jednak i takie, co przipóminajóm postacie ze STAR TREKA, czy PLANETY MAŁP, STAR WARS. A zaś kancelaria prawno, wyjynto jakby żywcym z ADWOKATA DIOBŁA z Pacino to kolejy plus i nastympne szprytne nawiónzanie.
- wóntki z klasycznych hororów (nawiedzóny dóm, łopyntane dziecko itp.) sóm uaktualniane przez nawiónzania do współczesności (pogóń demónów z innego wymiaru za ich samicami ukrywajóncymi sie na Ziymi, to nic innego jak feministyczno, zakamuflowano sprawa obrzezanio kobiyt znano z krajów Islamu i afrykańskich)
- kryzysy dómowe miyndzy małżyństwami wywołuje nawiedzóne dziecko, z którym normalni śmiertelnicy niy umióm sie poradzić
- lynki, zwónpiynia i myśli samobójcze sóm tukej spersónifikowane jako demóny - to łóne do tego namawiajóm i takie objawy wywołujóm (co jes starym jak świat chwytym znanym z podań folklorystycznych).
- w łodcinku kaj porwany przez handlyrzy demónów (a niy ludzi) Anioł walczy w niylegalnych walkach mutantów (z rzeczywistości znómy koguty, psy itp.) mómy tyż ylemynty kina wiynziynnego, a poza tym epizodycznie, ale zabawnie zaznaczóno jes opozycja miyndzy starymi, a nowymi mediami (korzystać ze starych ksióng, czy z baz internetowych?)
- pojawio sie nawiónzanie od DÓMU LALKI Ibsyna (Cordelia w jednym z odc. gro w teatralnym przedstawiyniu nojpewnij Nora - wypowiado kwestie do Torvalda)
- prcownicy kancelarii prawniczyj pokozani sóm krytycznie, jako bierónce udział w wyścigu szczurów japiszóny
- motyw z filmu BODYGUARD przeplato sie z wóntkiym ukazujóncym prowda o hollywoodzkich pokusach piynkna i operacjach plastycznych (jedna ze starzejóncych sie aktorek chciałaby być ukónszóno przez wampira bele ino sie niy starzeć i być wiecznie modo, żeby grać)
- pojawio sie krytyka narkotyków i środków dopingujóncych (pod ich wpływym w demónach - czytej: w ludziach - wyzwalo sie zło)
- natura Anioła przipómino zachowania człowieka w depresji, apatii
- seksualność Anioła pokozano jes jako probym (i to niy jak to sie czynsto interpretuje i pokazuje w literaturze, że wampir to zakamuflowany gej. W syrialu jedna z bohaterek posóndzo niyzainteresowanego nióm Anioła o impotyncja. Tymczasym do Anioła odbycie stosunku seksualnego jes równoznaczne z powrotym do swoij złyj natury (niy sóm sex jes zły, ale to co spowoduje)
- pwrót Feith (Eliza Dushku!) na dobro dróga to jakby: a) nawracanie Vadera z GWIEZDNYCH WOJYN, b) leczynie sie ze zła, jakby z alkoholizmu (niymal terapia przełazi)
- odpokutowanie grzechów przez Anioła mo wymiar katolicki, sóm przepowiednie, wizje mistyczny (chrześcijańsko spuścizna sie kłanio)
- Stephanie Romanov (szałowo bruneta z kancelarii prawnyj!) przipómino typowo noirowsko femme-fatal