Czego sie z tego filmu dowiadujymy? Bynajmnij niy tego czymu Aleksander Wielki był wielki, ino co najwyżyj tego, że Angelina Jolie i Rosario Dawson fajnymi dziołchami sóm...

Jes tukej pora szprytych kónceptów operatorskich (niymal psychodeliczne zdjyńcia pokazujónce Persa Dariusza jako kogoś złowieszczego na polu bitwy, pejzaże i panóramy sóm zaś zniykształcóne, jakby paczało sie na nie przerz soczewka, abo przez szklano kula, co tyż jes czynstym chwytym oglóndanym w teledyskach). I to by było... tyla. Stone niy bardzo wiy, czy chce "godanego" filmu filozoficznego (a na taki sie zapowiado, jak ino Hopkins zaczyno narracja), czy wojynnego (sekwyncje batalistyczne), czy może czegoś a la tragedia grecko abo szekspirowsko, kaj na królewskim dworze kónkurynty do trónu wyrzynajóm sie wzajymnie...

Dugie to i niy poskłodane niystety, a rozmach inscynizacyjny (Babilón richtig robi wrażynie) jes ino mómyntami zachwycajóncy (bo zaś ogłoszynie sie Filipa królym wszyskich Greków odbywo sie np. w jakimś zapyziałym amfiteatrzyku, nijak niy oddajóncym tego, co znómy z podrynczników historii na tymat architektury teatrów greckich) - czyli krótko godajónc co?

Czyli wielko superprodukcja, któro za wielkim filmym niy jes...